20 DE XUNU. DIA MUNDIAL DE LA PERSONA REFUXADA
Visibilizar a los invisibles.
Refuxaos/es: víctimes del negociu de la guerra.
Solidaridá dende Asturies.

LLUNES QU’ENTRA, 20 DE XUNU. DIA MUNDIAL DE LA PERSONA REFUXADA

Actu solidariu na Plaza del Parchís, Xixón, a les 20 hores.

Les persones colombianes refuxaes sabemos qu’Europa trancó les fronteres y nun quier recibir refuxaos, anque sigue falando de drechos humanos, vendiendo armes y faciendo negocios en países con conflictu armáu internu, como’l nuesu.

Llamentable. Y cayemos na cuenta de que’l conflictu colombianu desapaeció de ciertes axendes y medios.
Entendible.

Pa dalgunos demócrates los negocios siempre son primero que los drechos humanos y esi propósitu gafu impón el que les víctimes siamos invisibles.

Pa visibilizar la traxedia cotidiana de la nuesa xente y poner d’actualidá la realidá de los persiguíos nel mundiu, convocamos a un actu solidariu con motivu del día mundial de la persona refuxada, el llunes 20 de xunu na Plaza del Parchís de Xixón, a les 20 hores.

Coleutivu de Colombianos/es Refuxaos/es n’Asturies "Luciano Romero Molina".


Saludos NEL DÍA MUNDIAL DE LA PERSONA REFUXADA

Tengo’l deber y la obligacion y la solidaridá de dar un abrazu a los mios coterráneos que güei igual qu’ayeri tocó-yos salir a buscar un aire pa la reflexón y seguir na xera por un compromisu y l’aición de buscar la soberania, la paz con xusticia social, que güei mos fai falta a toos/es nel nuesu territoriu nacional (COLOMBIA) UN ABRAZU al coleutivu de refuxaos y a la solidaridá d’esi pueblu, Xixón, y a toa Asturies y a Soldepaz por ayudar a mitigar un poco más la VIDA que mos impuxeron.

Gracies al so bon llabor
TOMÁS RAMOS


Nel día de les invisibles.
/textos/hemeroteca/2011_1/20-j.html

Reciban el mio más sinceru saludu fraternal.

Cuntar la esperiencia del exiliu, suena delles veces como cuentu fantasmagóricu... y los que leuescuchen imaxinen qu’eso namás asocede nun país del escaezu, la traxedia y la inopia; pero los que lu vivimos y sufrimos en carne propio, los que dexemos empara de les nueses vides, los nuesos terruños, los nuesos conciudadanos, los nuesos golores a tierra llabrao, a alboreceres cálidos y xelaos; a los que mos desprendimos de sutaque de los tastes tropicales, maternales y hermanables; que salimos volaos del cachu de cielu que mos da abellugu, esperanza y suaños; los que lloremos en silenciu de la qu’aterricemos na realidá del posible non retornu, o del regresu a atopar la indiferencia, el dolor,la humillación, la persecucion, la desolación y/o la desapaición de los que se quedaron lluchando...

Amigos, hermanos, entá m’alcuerdo cómo se m’engurria l’alma cuando escuchaba ocasionalmente les voces de los mios seres amaos al otro llau del océanu, rogando’l mio retornu, y preguntándose del ¿por qué a nós ?, ¿a qué horas se m’ocurrió?... en fin... namás el que lo vive lo sabe.

¡Puxu colombianos!, acó vamos tar hasta cuando mos dexen, nun hai que se dar nel intentu de buscar que’l meyor vivideru del mundiu lo sía daveres pa toos.

Axunto presento la situación que viven los compañeros ex-trabayadores de Telecom, arrasaos por Telefónica d’España, y que, de dalguna manera, son tamién exiliaos, ensin trabayu, con casos xudiciales trespapelaos, mientres los alministradores de turnu namás atinen a quitamos la empresa de telecomunicaciones de Bogotá, padremuñu de los bogotanos, con más de 127 años.(800 sindicalistes que tán asesinando lentamente). Y asina quieren firmar el TLC.

Quitaránmos la vida, les empreses, el trabayu, les nueses finques o cases... pero de xuru que los ideales van caltenese, van tar llatentes los nuesos propósitos nobles, y dalgún día los nuesos ñetos van poder irguir arguyosos que gracies a tolos compañeros cayíos, a los constantes y testerones algamáronse los oxetivos plantegaos dende los bisagüelos maltrataos... y sedrá la dignidá del pueblu colombianu la que va guañar y va quedar como exemplu máximu de vida.

Un saludu inmensu y fondu a tolos amigos asturianos, españoles, europeos y colombianos residentes por esi apoyu incondicional, manifiesto daveres públicamente y en nome de les families de los que tornemos col corazón d’aceru y la mente enllena d’esperances, que tamos entá na llucha, que d’esi aire abrazador y fortalecedor que mos impregnó gastemos mui poco, nun vamos morrer arrodiyaos, cola frente n’alto vamos tar preparaos pa siguir la xera.

Abrazote pais.


ACTU SOLIDARIU, 20 HORES PLAZA DEL PARCHÍS, XIXÓN, LLUNES 20 DE XUNU, DÍA MUNDIAL DE LA PERSONA REFUXADA.

Nel día de los invisibles
Nun somos delincuentes fuxendo de la xusticia, nin turistes buscando emociones fuertes. Somos seis sindicalistes y defensores de los drechos humanos persiguíos a muerte en Colombia y refuxaos temporalmente en Xixón, gracies a la solidaridá asturiana.

Dalgunes persones pregúntenmos: ¿pero Colombia nun ye una democracia? Sí, respondemos. Colombia ye una y varies realidaes al tiempu: la guapa, exótica y tropical, la d’una minoría opulenta y una mayoría emprobrecida, la que dexa ganancies suculentes llibres d’impuestos pa les tresnacionales y la de millones de seres humanos esfamiaos y persiguíos. Ye una de les democracies más antigües y peculiares d’América: nel sieglu pasáu namás tuviemos una dictadura que duró poco, hai eleiciones cada cuatro años a pesar del conflictu armáu internu álxidu y tenemos una constitución política bayurosa en drechos que nunca se cumplen.

La nuesa patria, tan formosa como ayena, ye’l reinu de la inxusticia social, la corrupción y la impunidá, la de la esclusión política y de la violencia como mediu p’acaparar más tierres, riqueces y poder políticu en poques manes.

La nuesa cotidianidá tien como compañera permanente a la violencia y a la impunidá. N’Asturies atrevémosmos a cuntar hestories personales pequeñines pa ilustralo.

Henry ye dirixente llabriegu y sobrevivió va un añu a un atentáu de los paramilitares que llegaron de nueche a so casa pa matalu pol so activismu en pro de los drechos humanos. Trés disparos dexáron-y secueles graves, pero nun pierde la fe nel futuru.

José ye un llabrador mui mozu y ye hermanu d’Alba Nelly, la dirixente comunal que desapaeció pocos meses dempués de dar testimoniu énte la Comisión Asturiana que verificaba l’estáu de los drechos humanos nel Altu Ariari. Nelson, hermanu d’Alba Nelly y de José, encabezó l’afanosa busca per tola rexón y llogró establecer qu’ella desapaeció nel sitiu onde acampaben les tropes del batallón 21 Vargas del exércitu nacional. Pero la busca d’Alba Nelly suspendióse porque n’agostu pasáu a Nelson asesináronlu na güerta de so casa, delantre de la so familia. José nun pue reclamar los cuerpos d’otros familiares executaos pol exércitu y arroxaos a la fuexa - cementeriu de La Macarena.

María ta amenazada de muerte y llora d’indignación porque comprobó esti añu que’l so hermanu indixente, asesináu va años, en realidá foi víctima d’una execución estraxudicial del exércitu que lu presentó como “N.N. guerrilleru dau de baxa en combate”.

Tamién tán refuxaos n’Asturies, tres recibir amenaces series de muerte, Gloria, Irma y Fabián. Opónense a les privatizaciones de la salú y de la educación superior, denuncien la impunidá, la corrupción y el desaposiu violentu de les tierres de los llabradores.

Na cai pregéntenmos delles veces si la guerrilla tamién ataca los drechos humanos. Sí, respondemos, y refugamos los sos abusos, pero pa ún como ciudadanu ye devastador comprobar nel so propiu pelleyu o nel de la so familia, que ye l’Estáu y los sos axentes, obligaos a respetar la llei, los que de manera sistemática ya impune y aliaos con grupos paramilitares cometen a diario delitos atroces qu’aumenten el terror que dicen combatir.

Nun esaxeramos. La ONX dixo esti añu que Colombia ye ún de los siete países más desiguales del planeta y el segundu del mundiu con más refuxaos internos, amás afirma qu’en Colombia hai polo menos 27 mil persones desapaecíes. Nun hai un sitiu más peligrosu que Colombia pa exercer les llibertaes y drechos sindicales, afirmen los sindicatos del mundiu dende hai venti años nes asamblees de la OIT. La Fiscalía Xeneral de Colombia afirmó que ta investigando l’asesinatu pol exércitu nacional de 2.547 persones civiles a les que presentó como muertos en combate. HRW y Amnistía Internacional afirmen que’l cambéu de tonu del gobiernu de Juan Manuel Santos nun supón la disminución de los abusos. Nel últimu añu aumentaron les masacres, los homicidios nes ciudaes colombianes, les amenaces de muerte, la violencia sexual escontra muyeres y neñes y la desapaición forciada de persones.

Qu’en Colombia les coses ameyoraron namás lo afirmen persones interesaes en que la nuesa traxedia nun se vea, xente que nun se xuega la vida allá pa demostralo. Que-y lo digan a los seis que tamos n’Asturies persiguíos, o a los 3,5 millones de persones refuxaes internes, o a los familiares de los 52 sindicalistes asesinaos l’añu pasáu, incluyida la familia del nuesu compañeru d’exilu astur, Henry Ramírez Daza, asesináu hai poco más d’un añu.

Los refuxaos colombianos sabemos qu’Europa trancó les fronteres y nun quier recibir refuxaos, anque sigue falando de drechos humanos, vendiendo armes y faciendo negocios en países con conflictu armáu interno, como’l nuesu. Llamentable. Y cayemos na cuenta de que’l conflictu colombianu desapaeció de ciertes axendes y medios. Entendible. Pa dalgunos demócrates los negocios siempre son primero que los drechos humanos y esi propósitu gafu impón el que les víctimes siamos invisibles.

Pa visibilizar la traxedia cotidiana de la nuesa xente y poner d’actualidá la realidá de los persiguíos nel mundiu, convocamos a un actu solidariu con motivu del día mundial de la persona refuxada, el llunes 20 de xunu na Plaza del Parchís de Xixón, a les 20 hores.

Coleutivu de Colombianos/es Refuxaos/es n’Asturies “Luciano Romero Molina”.